පසුබිම් ගීතය හිටිවනම නතර වූ දිනයක
මිමිනුමක් බදු ස්වරයකින්
තවම තරු කියවිය නොහැකැයි
ඔබ තවම ගයන්නේ දැයි ඇසෙයි
පිලිවදන් නැති සුසුම්  දෙබසක අවසන
මඟ හැරුණු කවියක් ලියැවෙයි

 

පෙරලා කිසිත් නොවිමසන
මිදුන හදවතක් ළඟ නවතිමි
වසත් කල පිපෙන්නට
ශිත ඍතුවේ දිනක
නිසරු හිම පොළවක
ප්‍රීතියේ බිජුවටය වළලමි

කවි නැති සති

කෙටි කූරු අතැඟිලි අගින්
මං මගේ නළලත තදින්
තෙරපනා  දිනයක මැදින්
ශෝකයත් සදාකාලික නොවන බව
තිර ලෙසම පවසන

ප්‍රේමයෙන් මත් බවින්
රෝස මල් තබා  හද මැදින්
තුරුළු කර ගත් විට තදින්
තියුණු කටු ඇති බවක්
අනාරාධිතව මුමුණන

මගේ යැයි කිව හැකි
එකම එක බස
චපල පෙම්වතෙකු ලෙස
පිටව යා හැකිද
මා හැර ?